ZORAM TODAY| Aizawl 9th June, 2024 (Sun): Vaivakawn khawtlang chuan nimin khan Vaivakawn huamchhung Sairang Kawngpuiah "Zu leh Ruihhlo do beihpui thlak" hawnna hun an hmang a. He hunah hian kawngzawh in vengchhung mipui punkhawm an buatsaih nghal. Lalnghinglova Hmar, Aizawl West II Bialtu MLA & Excise and Narcotics Department Minister ni bawk chuan he beihpui thlâk hi a hawng.

Minister Lalnghinglova Hmar chuan Vaivakawn mipuiin tang ruala ruihhlo do an tum tlat hi a tha a tih thu a sawi a, sawrkar nen thawhhona tha tak an neih a theihtawp an chhuah chuan an tum a hlawhtlin ngei a rin thu a sawi bawk. Sum leh pai lamah theih ang a tanpui a tum thu a sawiin Vaivakawn Local Council hnenah cheng ₹20,000 a pe a, a tul ang zelin sum lama tanpui zel a inhuam thu leh harsatna an neih huna biak theih reng a ni tih a sawi bawk.

Vaivakawn Branch YMA Secretary Laltanpuia chuan punkhawmna hun hmanna kaihruaiin, Vaivakawn Local Council Chairman R.Zothanmawia'n thu a sawi a, "Helai vela khawsa te, hei hi kan hriattir a che u: Vaivakawn nih ve zel in la duh a nih chuan in eizawnna hi thlak nghal turin kan ngen che u a, in thlak thei lo a nih chuan naktuk atang in he hmun hi chhuahsan nghal mai turin kan hriattir a che u. Khua leh tui tha nih duh te kan haw lo, amaherawhchu, Vaivakawn khua leh tui nih zel duh chuan khawtlang invawnna dan zawm a ngai. Hemi zawm thei lo chu khua leh tuiah kan pawm thei tawh lo tih kan in hriattir a ni," a ti.

LC Chairman chuan, "Zu leh Ruihhlo zuar tura Vaivakawn rawn pan thin te u, hei hi kan hrilh a che u. Tun atang chuan Vaivakawn min rawn tih bawlhhlawh sak tawh suh u. Hetiang mı tan Vaivakawn area ah hmun a awm tawh lo. Vaivakawn khawtlang inkaihhruaina dan pal zuta min rawn chim buai tawh lo turin kan hriattir a che u," a ti bawk.

He hunah hian Vaivakawn chhungtin atangin mi pakhat aia tlemlo an pungkhawm a, an veng a ruihhlo zuar leh ti thin an veng pankhawmtu te chu sim tura chahin, ruhhlo zuar te pawh an veng chhuahsan turin an au rual a ni.

A sen chi lane leh veng chhung ruihhlo zawrh tamna hmunah tlawmngaia duty tur an in dah tan tawh dawn a ni.